Cad é Tascfhórsa Ardleibhéil an Bhainc Ceannais Eorpaigh maidir le Simpliú?
Chuir Comhairle Rialaithe BCE an Tascfhórsa Ardleibhéil maidir le Simpliú le chéile chun tograí a fhorbairt ar mhaithe leis an gcreat stuamachta, rialála, maoirseachta agus tuairiscithe Eorpach a shimpliú, agus an earnáil baincéireachta san Eoraip a choinneáil láidir ag an am céanna.
Bunaíodh an tascfhórsa i bhfianaise na díospóireachta domhanda atá ann faoi láthair maidir le castacht na rialacha agus rialacháin airgeadais, agus tá sé comhsheasmhach le tionscnamh foriomlán an Choimisiúin maidir le simpliú.
Cé atá ar an tascfhórsa?
Déanann Leasuachtarán an Bhainc Ceannais Eorpaigh Luis de Guindos cathaoirleacht ar an tascfhórsa. Is iad seo a leanas na comhaltaí eile; Gobharnóir Bhanc Ceannais na hEastóine (Madis Müller), Gobharnóir Bhanc Ceannais na Fionlainne (Olli Rehn), Gobharnóir Bhanc Ceannais na Fraince (François Villeroy de Galhau), Gobharnóir Bhanc Ceannais na Gearmáine (Joachim Nagel) agus Gobharnóir Bhanc Ceannais na hIodáile (Fabio Panetta), mar aon le hIonadaí BCE ar an mBord Maoirseachta Sharon Donnery.
Céard atá ar bun ag an tascfhórsa?
Cumhdófar an dá phríomhréimse seo a leanas le tograí an tascfhórsa maidir le simpliú:
- an creat rialála, lena n-áirítear struchtúr caipitil agus cur chun feidhme BASEL III
- na próisis tuairiscithe agus mhaoirseachta a chuíchóiriú chun forluí agus neamhéifeachtúlachtaí a dhíothú
Chomhaontaigh comhaltaí an tascfhórsa gur cheart na tograí a choinneáil ag an leibhéal reatha d’athléimneacht airgeadais na hearnála baincéireachta Eorpaigh, agus níor cheart dóibh an bonn a bhaint de shóchmhainneacht ná comhlíonadh rialála na mbanc Eorpach.
Rachaidh an tascfhórsa i gcomhairle leis an mBord Maoirseachta maidir le saincheisteanna maoirseachta agus cuirfidh sé tionscnaimh atá ann cheana ag maoirseacht baincéireachta na hEorpa san áireamh chun éifeachtúlacht, éifeachtacht agus fócas rioscabhunaithe na maoirseachta stuamachta a mhéadú.
Déanfaidh sé comhordú freisin le húdaráis Eorpacha eile, lena n-áirítear an tÚdarás Baincéireachta Eorpach agus a thascfhórsa maidir le héifeachtúlacht an chreata rialála agus maoirseachta.
Tá sé beartaithe ag an tascfhórsa ardleibhéil a thograí maidir le simpliú a chur faoi bhráid na Comhairle Rialaithe faoi dheireadh 2025, agus ina dhiaidh sin cuirfidh aon thogra críochnaitheach faoi bhráid an Choimisiúin.