Cinntí arna ndéanamh ag Comhairle Rialaithe an Bhainc Ceannais Eorpaigh (sa bhreis ar chinntí maidir le socrú rátaí úis)

Bealtaine 2025

16 Bealtaine 2025

Oibríochtaí margaidh

Athbhreithniú bliantúil ar an liosta margaí neamhrialaithe is inghlactha agus ar an liosta gníomhaireachtaí aitheanta i gcreat comhthaobhachta an Eurochórais

An 22 Aibreán 2025, tar éis an athbhreithnithe bhliantúil ar na liostaí sin, chinn an Chomhairle Rialaithe gan athrú a dhéanamh ar liosta na margaí neamhrialáilte a nglacann an Banc Ceannais Eorpach leo nó ar liosta na n-eisitheoirí a aithníonn an Banc Ceannais Eorpach mar ghníomhaireachtaí atá incháilithe le haghaidh rannpháirtíocht i gcreat comhthaobhachta an Eurochórais. Chinn an Chomhairle Rialaithe freisin dhá ghníomhaireacht (Caisse des dépôts et consignations agus Finnvera PLC) a shannadh do chatagóir chaolchorrlaigh níos fabhraí tar éis dóibh na critéir chainníochtúla ábhartha a chomhlíonadh. Os a choinne sin, chinn an Chomhairle Rialaithe LfA Förderbank Bayern a athaicmiú ó chatagóir II go dtí catagóir chaolchorrlaigh atá níos coimeádaí, catagóir IV. Tá na liostaí reatha le fáil ar shuíomh gréasáin an Bhainc Ceannais Eorpaigh.

Beartas macrastuamachta agus cobhsaíocht airgeadais

Athbhreithniú ar Chobhsaíocht Airgeadais – Bealtaine 2025

An 14 Bealtaine 2025, thionóil an Chomhairle Rialaithe malartú tuairimí maidir le ceisteanna cobhsaíochta airgeadais sa limistéar euro bunaithe ar eagrán mhí na Bealtaine 2025 den Athbhreithniú ar Chobhsaíocht Airgeadais agus d’fhormheas sí a foilsiú ar shuíomh gréasáin an Bhainc Ceannais Eorpaigh. Chomh maith le forbhreathnú a thabhairt ar phríomhleochaileachtaí cobhsaíochta airgeadais sa limistéar euro, tá trí ghné ar leith san eagrán seo. Tugann an chéad ghné forbairtí reatha sna margaí cripteashócmhainní agus an méadú ar idircheangailteacht idir eiceachóras na gcripteashócmhainní agus an earnáil airgeadais thraidisiúnta. Leis an dara gné scrúdaítear na rioscaí do chobhsaíocht airgeadais an limistéir euro mar gheall ar an teannas trádála, agus leis an tríú gné breathnaítear ar na bealaí trína bhféadfadh aosú an daonra imní maidir le cobhsaíocht airgeadais sna hearnáil airgeadais agus neamhairgeadais a ardú. Tá an tAthbhreithniú ar Chobhsaíocht Airgeadais le foilsiú ar shuíomh gréasáin an Bhainc Ceannais Eorpaigh an 21 Bealtaine 2025.

Bonneagar margaidh agus íocaíochtaí

Creat athbhreithnithe le haghaidh saoráid chreidmheasa na gcontrapháirtithe lárnacha in TARGET a chur chun feidhme

An 22 Aibreán 2025, d’fhormheas an Chomhairle Rialaithe an cur chuige cur chun feidhme mionsonraithe le haghaidh athbhreithniú a dhéanamh ar an gcreat is infheidhme maidir le contrapháirtithe lárnacha (CPLanna) ag fáil rochtain ar shaoráid chreidmheasa a bhaineann le géarchéim in TARGET. Cinnteofar leis an gcreat athbhreithnithe, nach cuid den chreat cur chun feidhme beartais airgeadaíochta é, an oibríochtú pras a bheidh ag cúlstop leachtachta do CPLanna sa limistéar euro atá incháilithe faoi chásanna foircneacha géarchéime. Beidh rochtain faoi réir coinníollacha lena áirithiú nach bhféadfaidh ach CPLanna an limistéir euro atá fónta ó thaobh airgeadais de agus bainistíocht riosca leachtachta fónta rochtain a fháil ar an tsaoráid chreidmheasa CPL. Tugtar faisnéis níos mionsonraithe i bpreaseisiúint ghaolmhar, le fáil ar shuíomh gréasáin an Bhainc Ceannais Eorpaigh.

Comhairle maidir le reachtaíocht

Tuairim BCE ar thogra le haghaidh rialachán ó Pharlaimint na hEorpa agus ón gComhairle lena leasaítear Rialachán (AE) Uimh. 575/2013 maidir le ceanglais stuamachta i gcomhair institiúidí creidmheasa a mhéid a bhaineann le ceanglais le haghaidh idirbhearta um maoiniú urrús faoin gcóimheas glanchistiúcháin chobhsaí

An 2 Bealtaine 2025, ghlac an Chomhairle Rialaithe le Tuairim CON/2025/9 ar iarratas ó Chomhairle an Aontais Eorpaigh agus ó Pharlaimint na hEorpa. Beidh an Tuairim ar fáil in am trátha ar EUR-Lex.

Treoirleabhar 2025 um dhul i gcomhairle leis an mBanc Ceannais Eorpach ag údaráis náisiúnta i dtaobh dréachtfhorálacha reachtacha

An 2 Bealtaine 2025, thug an Chomhairle Rialaithe dá haire Treoirleabhar 2025 um dhul i gcomhairle leis an mBanc Ceannais Eorpach ag údaráis náisiúnta i dtaobh dréachtfhorálacha reachtacha. Foilsíodh an Treoirleabhar, atá ina uirlis tagartha do na húdaráis chomhairliúcháin, an Banc Ceannais Eorpach agus don phobal i gcoitinne, don chéad uair in 2005. Nuashonraíodh é in 2015 agus anois tá athbhreithniú breise déanta chun mórghníomhaíochtaí atá tarlaithe le deich mbliana anuas a léiriú. Áirítear sna forbairtí sin soléirithe ar nithe maoirseachta stuamachta áirithe, bunaithe ar níos mó ná deich mbliana de thaithí leis an Sásra Maoirseachta Aonair (SMA), agus ar chásanna neamhchomhlíontachta a léirítear sa Tuarascáil Bhliantúil an Bhainc Ceannais Eorpaigh a raibh sáruithe soiléire suntasacha an dualgais dul i gcomhairle le BCE acu. Tá an Treoirleabhar ar fáil ar shuíomh gréasáin BCE sna 24 theanga oifigiúla an Aontais.

Tuairim BCE maidir le tograí le haghaidh leasuithe ar thuairisciú inbhuanaitheachta corparáideach agus ar cheanglais díchill chuí

An 8 Bealtaine 2025, ghlac an Chomhairle Rialaithe Tuairim CON/2025/10 arna ullmhú ag an mBanc Ceannais Eorpach as a stuaim féin. Beidh an Tuairim ar fáil in am trátha ar EUR-Lex.

Tuairim BCE maidir le hathléimneacht eintiteas criticiúil

An 12 Bealtaine 2025, ghlac an Chomhairle Rialaithe Tuairim CON/2025/11 arna ullmhú ag an mBanc Ceannais Eorpach as a stuaim féin. Beidh an Tuairim ar fáil in am trátha ar EUR-Lex.

Rialachas corparáideach

Moladh ón mBanc Ceannais Eorpach maidir le hiniúchóirí seachtracha Hrvatska narodna banka

An 12 Bealtaine 2025, ghlac an Chomhairle Rialaithe Moladh BCE/2025/15 do Chomhairle an Aontais Eorpaigh maidir le hiniúchóirí seachtracha Hrvatska narodna banka. Beidh an Moladh ar fáil in am trátha ar EUR-Lex.

Staidreamh

Creat um aisíocaíocht costas le haghaidh tionscadal Tascanna Oibríochtúla Foclóir Tuairiscithe Comhtháite na mBanc

An 24 Aibreán 2025, d’fhormheas an Chomhairle Rialaithe imchlúdach airgeadais don tréimhse Bealtaine 2025 go Deireadh Fómhair 2026 le haghaidh céim réadaithe thionscadal Tascanna Oibríochtúla Foclóir Tuairiscithe Comhtháite na mBanc (BIRD) agus ghlac sí dhá chinneadh BCE ar chomhroinnt na gcostas leis an SMA lena n-áirítear tionscadal Oibríochtúla BIRD sa chreat um aisíocaíocht le haghaidh institiúidí SMA maidir le húsáid sheirbhísí Chóras Eorpach Banc Ceannais (CEBC). Is seirbhís staidrimh CEBC é BIRD ina bhfuil samhail sonraí chomhtháite agus chomhchuibhithe agus foclóir tuairiscithe. Tá sé beartaithe feabhas suntasach a chur ar cháilíocht, ar chomhsheasmhacht agus ar chruinneas na sonraí staidrimh agus stuamachta a thuairiscíonn na bainc do na húdaráis. Tá an dá ghníomh dlí, Cinneadh BCE/2025/13 lena leasaítear Cinneadh (AE) 2022/1981 maidir le húsáid sheirbhísí an Chórais Eorpaigh Banc Ceannais ag údaráis inniúla (BCE/2022/33) agus Cinneadh BCE/2025/14 lena leasaítear Cinneadh (AE) 2022/1982 maidir le húsáid sheirbhísí an Chórais Eorpaigh Banc Ceannais ag údaráis inniúla agus ag údaráis chomhoibritheacha (BCE/2022/34), ar fáil ar EUR-Lex.

Maoirseacht Baincéireachta BCE

Pionóis riaracháin arna bhforchur ar thrí bhanc sa limistéar euro

An 18 Aibreán 2025, d’fhógair BCE gur fhorchuir sé trí phionós riaracháin le haghaidh méid iomlán de EUR 1.24 milliún ar AS SEB Pank, AS “SEB banka” agus AB SEB bankas (ar a dtugtar SEB Baltics orthu le chéile) toisc nach bhfuil na ceanglais a bhaineann le corrlach coimeádachais le haghaidh cuid dá samhlacha inmheánacha á comhlíonadh acu. Tá preasráiteas lena mbaineann ar fáil ar shuíomh gréasáin maoirseachta baincéireachta an Bhainc Ceannais Eorpaigh.

Tuarascáil bhliantúil 2024 ar ghníomhaíochtaí smachtbhannaí SMA

An 8 Bealtaine 2025, níor chuir an Chomhairle Rialaithe in aghaidh moladh ón mBord Maoirseachta an Tuarascáil Bhliantúil ar Ghníomhaíochtaí Smachtbhannaí in SMA in 2024 a fhoilsiú. Cuirtear i láthair sa tuarascáil staitisticí comhiomlána don SMA ina iomláine, bunaithe ar shonraí a bhailítear agus a thiomsaítear trí chatagóirí caighdeánaithe a úsáid chun tacar comhchuibhithe agus inchomparáide faisnéise a áirithiú. Taispeántar sa tuarascáil gur tháinig méadú mór ar líon na n-imeachtaí agus pionóis in 2024 (+19 % agus +8 % faoi seach, i gcomparáid le 2023). Tá an tuarascáil ar fáil ar shuíomh gréasáin maoirseachta baincéireachta BCE.